لقاء تلفزيوني للمهندس منسي و الاعلامية ايه رضوان عن الصناعه و بدايته الهندسيه و الصناعيه

 

مقدمة المذيعة :مساء الخير مساء السعادة عليكم ازيكم عاملين ايه ؟ النهاردة موضوع حلقتنا مختلف تماما عن اي حلقة بنتكلم عن شخصية عامة شخصية تقدر لما تقعد معها تديك الطموح والامل تديك النجاح بمعنى أصح تتعلم منها الهدوء والعقلانية الكبيرة معنا معكم النهاردة مهندس منسي وهو مدير مجلس إدارة شركة ومدير عام لشركة مهندس منسي وغير كده رئيس تحرير لمجلة الامة العربية مساء الخير يا بشمهندس

المهندس منسي : متشكرين ازي حضرتك  ؟ متشكر قوي

المذيعة : طبعا أنا أتعلمت من حضرتك بمجرد معرفتك حاجات كتير جدا ما شاء الله هادي جدا عقلانية كبيرة جدا الحمد لله عاوزين نعرف من حضرتك في بداية حياتك كده وصلت ازاي  ؟ أو أول خطوة لك كانت إزاي ؟

المهندس منسي : هو اول خطوة كان مكتب مكتب كنت عملته في  منطقة باب الشعرية

المذيعة : برضه حضرتك مش فاهمني الهدوء والعقل الراسي ده و الخبرة الكبيرة دي أكيد أكتسبتها بعد مجهود كبير جدا

المهندس منسي : اه كبيرة جدا هو العلم والرياضة دول بيهدوا الشخصية معروفة يعني حتى دايما يقول لك اخلاقه رياضية يعني الحمد لله انا لاعب تنس وواخد فيه بطولة فيها وواخد كارنيه اتحاد التنس  لاعب رواد لاعب رواد يعني قدوة حسنة يعني نقتدي به مش انا لوحدي طبعا في ناس كتيرة

المذيعة : اكيد اه

المهندس منسي : ولكن هو أتعلمت من اللعبة ديت التريس إن إنا ما أنفعلش لانفعالات غيري يعني مثلا لو حد اللي قدامي منفعل لأ انا ما انفعلش الانفعالات لان انا شخصيتي المستقلة بذاتها كل ما ازددت في العلم وكل ما ازدت في القيمة كل ما حسيت بقيمة نفسك ما بقتيش تتفاعلي الانفعالات

المذيعة :  يعني الموضوع خلص اللي حصل حصل وعدى أه ما فيش إنفعالات

المهندس منسي : اه ولا حتى  طب هخليه يندم او لا لا باشمهندس منسي

المذيعة : عايزين برضو حضرتك تكلمنا عن نفسك اكتر عن طريق نجاحك بدأ ازاي؟ مشوارك بدائته ازاي؟

المهندس منسي : هو بدايتي كانت لما سافرت المانيا بغرض التريننج مم و يعني ربنا يا رب يبارك له  دكتور مهندس شولز هناك هو اللي اكتشفني وقال لي هخليك تكمل معنا دراسة في جامعة هاجن في المانيا تمام  كنا رايحين أساسا تريننج تبع شباب الخريجين كنا 5 ، كنا 5 أفراد و هناك هو ده اللي أكتشفني يعني شولز  هو دايما التعليم في المانيا بيبقى بيشرف عليك 2 واحد إنساني وواحد علمي

الانساني يأخدك يفسحك وتروحي السوبر ماركت في يوم ويطلع بك رحلات وليك بوك موني معاه وكل حاجة

المذيعة : اه بيدلعكم بمعنى اصح

المهندس منسي : ده ده اللي هو الانساني اللي هو يعني بيبقى سيكولوجي يعني

المذيعة : تمام اه

المهندس منسي : العلم بقى هو اللي بيشرف عليك اللي بيشرف عليك علمي ده بيكتشف فيك النقاط أو المهارات

المذيعة : المميزات اللي في حضرتك

المهندس منسي :  ايوة المهارات اللي هو بيكتشف فيك حاجات فهو هو على حسب قوله يعني قال ان هو انت كرياتيف يعني شخصية مبدعة ليه ؟

 لان هو كان كنا اثناء كنا بنعمل بروجكتوز مشاريع يعني ف المشاريع ديت فكنت دايما هم المشاريع خطوات في عالم الهندسة عموما خطوات بتمشي عليها بتؤدي لنتيجة فانا كنت دايما لي ايه  ؟  لي فكر مختلف اه يعني كان دايما لي فكر مختلف انت تقعد معنا

المذيعة : مش عاوز تمشي على اللي هم كاتبينه او اللي هم منظمينه فقط لا غير

المهندس منسي :   شايف ان في حاجة تانية اه يعني ممكن تتعمل مثلا بطريقة تانية تمام يعني مش عارف هكلمكوا في في حاجة مثلا بس مش عارف هتفهموني فيها ولا لأ يعني مثلا لما نيجي نتكلم في عجالة كده في ستاند حقن بلاستيك في مثلا صوابع النقل بتبقى ايه كان عاملينها 7 سم هاردنر مثلا فانا قلت لا ده انا اخليها 20 سم واخليها  فليكسبيبل اه فازاي هو عاملها ايس كريم لأ هو عاملها 7 وهاردنر انا عملتها 20 سم وايه فليكسبيبل ادت معي تايم اعلى تمام يعني لما تكون الحاجة مرنة وواخدة فهنا لما بتبقى مرنة فبتاخد وتدي معها اكيد فدي معلومة هندسية مش عارف الناس يفهموها ولا فمش عايز اتطرق واخوض في الهندسة اكتر من كده يعني

المذيعة : تمام سر بقى ان حضرتك تلقب يعني شركات كتير تلقب باسم حضرتك ايه السر في كده ؟

 المهندس منسي :  لأ هو بصي يا ستي انا الشركة اول الشركة انا عملتها كنت مسميها شركة ام تو باك

دي اول شركة انا عملتها تمام فرحنا يعني كنا بنعرض في معارض في قاعة المؤتمرات وفي أرض المعارض في مدينة نصر فكانوا الناس اللي واقفين تبعي يعني فكانوا دايما يقولوا الله! هي مش دي المهندس منسي بتاع باب الشعرية فلقيت الناس بتطلق على الشركة او بتحب

المذيعة : يعني الناس هي اللي لقبت هذا الامر مش حضرتك

المهندس منسي : مهندس منسي بتاع باب الشعرية اللي هو كان بدايتي يعني قبل ما ابقى من 14 سنة ما كانش اختيار حد اه من اختيار الناس نفسهم اه كان بدايتي هو ده البداية لان انا كنت انا اللي ببيع وانا اللي بشتري وانا اللي بعمل وانا اللي كل وانا حاجة قبل ما يبقى الشركة تاخد كيانها ويبقى فيها مديرين وفيها رؤساء اقسام وحاجات من دي تمام فكان فكنت انا لوحدي فكنت انا اللي بقابل العميل وانا اللي عليه وانا اللي بقعد ارسم واوري له رسوماته عنا كل حاجة يعني فكان العلاقة بيني وبين العميل دايريكت يعني على طول فبدأت بقى هنا بقى اللي هو العميل بدأ يعني كلمة المهندس منسي عنده نسي خالص ام تو باك وبقى هو المهندس بس خلاص هي اتعرفت المهندس كله بقى يقول لك المهندس ما قلته ولا حاجة عادي ما عنديش مانع ما هو كده كده برضه شركتي ولا حاجة طالما اللي الناس حباها امشي عليها

المذيعة : تمام في تعامل حضرتك مع العمال او يعني ازاي بتعاملهم طريقة حضرتك واسلوبك؟ بيخطؤوا كتير جدا الاخطاء ما بتلاقيش ما شاء الله

المهندس منسي :يعني بصي او اسأليهم الحمد لله من فضل ربنا انا الناس اللي عندي رؤساء والمديرين انا ما بعتبرهمش موظفين دول اخواتي واصدقائي لان انا في انتقائي  لهم  ما انتقيتهمش بناء على انهم عندهم مهارات البيع العالية او  لا لا لا انا انتقتهم بناء على انهم اخلاقهم عالية وما عليه تمام من بعد المبادئ والاخلاق يبدأ كل شيء يعني ده اللي تحتيه بقى تمام فهمتني ازاي ؟ فهنا انا لما التقيت الناس اللي هما بقوا دلوقتي مديرين الفروع وبقوا هما اللي بيمثلوا المهندس من ويعتبر وكلاء المهندس منسي فانتقدهم بناء على الاخلاق والمبادئ والتزامهم مع ربنا يعني او الجهد في العمل الخبرة بقى انا دوري ان انا اكسبها لك تمام انا دوري بقى اني اكسبها له يعني هم بييجوا حتى لو خريج هندسة ميكاترونيك أو ميكانيك أقرب التخصصات لشغلنا بنبدأ تاني ندربهم لان اللي درسه أكاديمي مش دراسة عملية تمام على عكس مثلا في جامعة هاجن كنا بندرس عملي اكتر ما بندرس نظري وده المفروض ان هو يتعمل

المذيعة : اه حضرتك بتتكلم وبس او بتديني حاجة اقرأها واحفظها مم برضو مش هحفظها وخلاص

المهندس منسي :نعم لازم عملي لازم

المذيعة : أعمل كل بايدي عشان هو حضرتك هي الاسلوب الهادي معروف به

المهندس منسي : الحمد لله

المذيعة : ولكن برضو خلينا يعني نتكلم في جانب الهندسة او الشغل عامة مم ازاي بتقدر تتعامل مع اللي حواليه؟ احنا كبشر بنلاقي اللي حوالينا في اللي بيستفزنا كتير جدا اه ولا اي حاجة انا ما لو لقيت ،  لا دايما اوصي الناس اللي حواليا بانه لو الانسان ما انتش قادر تتعامل معه  ما تقولوش انا مش هتعامل معك وما تقولوش كذا لا لا لا  حاول قدر الامكان تسحب نفسك من معه بدل ما ايه بدل ما تعصب نفسك معه وتضايق نفسك المهم هتكسب  جنيه عشان خاطر تروح تصرفه على أعصابك  فهمتيني؟ لو الانسان من اولها يعني هو بيبان من الشخصية نفسها والمكالمة بيبان تمام أه بيبان يعني النهاردة وانا جاي لحضرتك فبيقول لي ما هو حضرتك طالع في التليفزيون بتطلع في التليفزيون هنكلم حضرتك ايوة قلت له طب ما انت بتكلمني وريني اهو المذيعة : هو بيهزر معك بس ايه اللي هو هزار الهزار الرخم؟

المهندس منسي :  اه فهو فقلت له طب ما انت بتكلمني اهو انت انت مشكلة انا انا تليفوني ما زال محطوط مع الناس يعني انا مش عملت كابتن فريق ورحت قاعد على وبدرب لأ انا قاعد بلعب في قلب الملعب مم يعني انا كابتن فريق في قلب الملعب مش مدرب مثلا ورحت راكن على لأ

المذيعة :  بنسمع كتير جدا يا بشمهندس منسي يعني لو السكرتارية بتكلم حضرتك او بتعامل معاهم بيقولك الشخص او العميل بيسأل هو البشمهندس والرياضي ولا لأ مم طب دي ايه علاقتها

المهندس منسي :  اه هو ده اللي هيجنني اه يعني اه في جمهورية مصر العربية او في العالم العربي عموما خاصة العميل السعودي اه هو راضي ولا بيلعب رياضة؟ يسألك السؤال ده انت سنك كام؟ فعلا سنة مش عارف جاي يعمل معايا شغل ولا جاي يتجوز؟ قبل كده اه يتبسط قوي لما يكون اه لما يكون رياضي ليه؟ لانه انا كنت رافع فيديوهات وانا بلعب تنس و سباحة وكده بس هو الغالبية التنس دايما بحس فيها بنشوة اه بنشوى فهو زي ما تقولي بيختلط عليهم الاسم لما المهندس منسي كده محركات البحث يعني بتروح مطلعة لهم حتة كده ايه ان هو وهو بيلعب تنس الله!

فيقول له هو  لاعب تنس ولا ولا المهندس ولا ولا  صاحب ولا راجل اعمال ولا بيبيع مكن ولا في ايه بالظبط؟ فهمتني؟ فهو ده بيختلط عليهم بكده

المذيعة :فدايما السؤال ده بيسألوه مع ان الرياضة يعني في مننا كتير جدا بيشاهدها مش بيلعبها

المهندس منسي : بس انصحكم تلعبوها جوة اه بس انصحكو تلعبوها ليها فوايد كتيرة قوي

 

المذيعة : يعني كلمنا برضو عن  مجلة الامة العربية

المهندس منسي : اه دي مجلة عليها اكتر من  من اتنين مليون مقالة تمام  بصي حضرتك هو انا ما بزرعش في أرض غيري للاسف مع شديد الاسف يعني ان المجتمع العربي او العالم العربي كله معتمد على الفيس فعلا تويتر اه يوتيوب وخصوصا الفيس

المذيعة :يعني هقول لحضرتك شاف اربعة وعشرين ساعة

المهندس منسي : يعني هقول لحضرتك مثلا انا كنت بكلم واحد قاعد مع مع واحد يعني راجل محاسب ما شاء الله يعني وبعدين بقول له انا قوتي هي على مواقعي اللي على الانترنت قال لي اه ان شاء الله هبقى اعمل لك add هو علاقته بالانترنت فيسهو الفيس اه ما يعرفش في الانترنت غير الفيس دي اسمها الثقافة العامة ما فيش الثقافة بتاعته هو النت جوة الفيس لا طبعا فيه الفيس اللي هو فيس بوك دوت كوم مم فيه المهندس منسي دوت كوم فيه سين دوت كوم فيه صاد دوت كوم فيه فيه فيه جوجل دوت كوم فيه فيه مجلة الامة العربية اه اه فالناس ما تفهمش كده الناس بتفهم النت هو الفيس فمش كلهم مش عايزين نظلم الناس في ناس مثقفة ثقافة الانترنت لانه النهاردة الجاهل في اليابان على فكرة معجب قوي باليابان والمانيا والصين

المذيعة : سفرة اليابان والصين

المهندس منسي : انا سافرت في الصين و عندي موظفين في الصين أنا عرضت في الصين انا عرضت في الصين في معرض كانتون

المذيعة : يعني حضرتك ما اكتفيتش بفروع في مصر فتحت في الصين وفتحت البلاد الاخرى

المهندس منسي : هو هقول لحضرتك هي القصة إيه؟ وحدي الله هو قبل ما أعمل في الصين كنت بعمل ايه؟ مش كنت بصنع أجزاء المكن في مصر وببيع لمصر ما هو ده اللي انا ما فيش اكتر من انك انت هنا بقى لما بتيجي تروحي للصين بتتعاملي مع الصين ما بتروحيش بقى الورشة وتعملي قطعة غيار لا بتعملي ايه؟ بتعملي رسم بعمل رسم على برامج ثري دايمينشن اللي هو الحديث يعني اللي هو لغة العصر دلوقتي وببعتها باي ايميل بينفذوها بيقول لك انا كمان ببقى عارف السعر قبل ما ابعتها لهم لان هو السعر بيبقى يعني فوق تحت كذا ببقى عارف السعر بقول له دي كذا فدائما بجيب دايما بالأدنى وبشوف اللي هيقبل هيقبل واللي مش هيقبل خلاص بشوف غيره و غيره و غيره لغاية ما هو حد بيقبل يقول لي اه خلاص انا يعني مواعيدهم مزبوطة ملتزمين بصنع أجزاء المكن هناك وبجمعها برضو هناك أو أجمعها هنا ايا كان هنا اوكي مش هتفرق كتير

المذيعة : بتبيعها في مصر اه يعني بتجمعها وتبيعها في مصر

المهندس منسي : طالما انك صنعتيها هنا او في الصين تقدري في قيمة بقى مضافة اللي هو قيمة ايه بقى؟ انك إنتي أهتميتي بالاجزاء وعملتيها اه وبعد كده جمعتي يعني انا مثلا هنا في مصر ما في مكن بصنعه هنا في مصر تمام هل انا انصح واحد في مصر؟ لا بالتأكيد ولكن انا ماهر في مجالي يعني ربنا سبحانه وتعالى خلقني في النقطة دي تمام ومثلا ربنا سبحانه وتعالى خلق حضرتك في الاعلام لازم الأدوار بتتوزع علينا

المذيعة : كل واحد ليه مجال بروفشنال فيه

المهندس منسي : الله ينور عليكي

المذيعة :المهندس منسي بروفيشنال في تصنيع الآت

المهندس منسي : هو العملاء اللي حطوني في ماكينات مجال التعبئة و التغليف لكن أنا بصنع ماكينات في وجه العموم وبقالي اسم ومكاركة و براند عالمي في ماكينات التعبئة و التغليف أنا عرض في معرض كانتون بنبيع مكن في قلب الصين بننافس الشركات الصينية ممتاز

المذيعة : ما حصلتش من حد

المهندس منسي : لا حصلت حصلت في شركات كتيرة

المذيعة : اه في حد باع  بس الصين معروفة ان هي اللي بتصنع

المهندس منسي :  لا كان في شركة اه كان في شركة جانبية اسمها كوميتس هم بتاعة اوكر وحاجات من دي دي شركة عالمية البرانش بتاعها في مصر هو كان عارض جنبي تمام فتبصي تلاقي ان هو يعني الحمد لله من فضل ربنا تفوقنا حتى في الصين تفوقنا ممتاز اه الحمد لله من فضل ربنا يعني عملنا مكنة سهلة وبسيطة شلنا بطن المكنة كله شلنا كل الميكانيكا اختصر في ستيبر موتور في  وعملنا كامات وعملنا حاجات بسيطة قوي حتى لما حضرتك تشوفي  لما كنت بشرح للناس المكن في الصين

المذيعة : يعني اي عامل مبتدأ يعرف ان هو يشتغل عليها

المهندس منسي :  بس لازم يتدرب برضو اه هو احنا اعتمدنا كمان عملنا حاجة كويسة كمان اضافة اضافة للعالم العربي برضو إن إحنا عملنا ايه؟ عملنا فيديوهات شرح للمكن ده نادر قوي لما تلاقي حد يعملها

المذيعة : لأ حضرتك بتشرح بطريقة مبسطة جدا

المهندس منسي :  اه الحمد لله

المذيعة : طريقة حضرتك فيها هدوء كده مش بتتعصب عليهم اه وغير كده يعني انا عايزة برضو اسأل حضرتك يعني سهل جدا ان اي حد يسرق الشغل ده ويقول ده بتاعي انا اه مش بتاع حضرتك اه فإذاي بتقدر إن انت تحميه

المهندس منسي : لا بصي ده أنا أتسرقت لما اه ما انا بقول إتسرقت في التصميمات بتاعة يعني عملت معاك انا من عشر سنين فات ورسمتها وبدأت أنفذ فيها بعدها ب3 سنين يعني 7 سنين ، ببص لقيتها معمولة أه دلوقتي بقت أمة لا إله الا الله عملاها

المذيعة :أنا بقول لحضرتك الفكرة إزاي بتقدر تحمي مشاريع حضرتك أو أفكار حضرتك؟

المهندس منسي : لأ بص يا سيدتي هقول لحضرتك على حاجة قالها لي يعني شولز في المانيا قالها لي قال لي البئر بئر المياه هم لو ما أتاخدش منه المية ، المية اللي هتبقى موجودة هتبقى مية راكدة غير صالحة أما البئر طول ما أنت بتنزح منه وبتاخد منه بيتجدد بمياه جديدة اخرى وافضل من اللي قبلها

المذيعة : كل ده دي يا بشمهندس يتقال لو انا جيت وقلت لحضرتك ممكن اخد مشروع حضرتك او اعمل زيه لكن مش اني اسرقه من وراك واقول ان ده بتاعي انا ما هم ما عتقدش ان هو لو جه لحضرتك وقال لك هاخد المشروع ده هتقول له لأ ده بالعكس حضرتك بتساعد

المهندس منسي :  لا هابيعه له انا هاكون صريح معك اكيد مش هاقول له خد اديه له اقول له اه الرسومات والحاجات ديت هم بيعملوا ايه بقى؟ بياخدوا مكنة و ينسخوها عليها يا ستي ما هو  شولز قالي ان هو طول ما انت بتاخد من البئر ده كل ما هو بتيجي افكار يعني مش هقف مش مش هي الفكرة دي وخلاص لأ الحمد لله في افكار تانية بجددها ان انا على طول على طول عندنا حتى الناس عندنا في الشركة بسم الله ما شاء الله عليهم عندهم ابتكارات

المذيعة : مهندس المنسي ازاي تقدر ان انت تطور من نفسك؟ يعني تطور من نفسك احنا في عالم التكنولوجيا واكيد برضو بتختلف عن اجيال

المهندس منسي :  اه خدت ماجستير في تكنولوجي تمام اللي هو اختصارها اه لان هو كان عالم كان عالم الاكواد وعالم البرامج وعالم ده كان عالم مبهم بالنسبة لي يعني انا راجل بتاع اه بتاع هندسة مثلا يعني اعمل نسخ البارتس لقطعة لجزء حاجات من دي كان عالم الانترنت وعالم البرامج والحاجات دي كان لازم اعرفه لازم أتعلمه فقدمت في معهد للتكنولوجيا  في والحمد لله نجحت فيه وكده يعني طبعا  بصمم واقعي بنفسي انا اللي بصمم المواقع انا اللي المواقع بتتسرق ما شاء الله! بس عملت عليها حماية جامدة دلوقتي بس هو هقول لحضرتك على حاجة كل ما عملت سيكيورتي كل ما العميل بقى بطيء معاه الموقع يعني و انا جاي لحضرتك دلوقتي عديت على بوابتين ، البوابتين الامن خدوا مني وقت

المذيعة : اكيد اه

المهندس منسي :  فهمتني ازاي؟ فهنا نفس العملية في المواقع ان انا عملت بوابات امن عملت اربع بوابات امن تمام فهنا وهو بيفتح الصفحة فبتلودينج معاه فهو بيزهق ولا ايه؟ اه استنى اه فانا كان نفسي ان انا ما حطش ايه ما حطش لود محطش سكيورتي ويخليها كده بس الهاكر كان علينا كتير قوي كتير جدا خاصة من الهند اه

المذيعة : يعني المصريين غلابة بيتفرجوا

المهندس منسي : العرب كلهم مفيش ولا هكر اه مفيش

المذيعة : ولا جاي من االصين من برة

لأ بصي هو الامريكان والالمان لما تخشي تبصي تلاقيهم دخلوا وما عملوش حاجة اه بيخشوا بس زي اللي بيصطاد السمكة وبعد كده يرميها في البحر تاني تمام اما الهنود والباكستانيين والروس دول بقى يعني 600 خط دول يعني اجارك الله يعني

المذيعة : يسرقوا على طول وبياخدوا كل حاجة

المهندس منسي : مش بيسرق بقى بيحط عندك اه بيحط عندك انت مقالات المقالات ديت اه بتطلع تشير لو وبتعمل حاجات من دي لوحده يعني. يعني اللي هو بيركب ايه؟ بيركب الموجة يعني بيركب قوة الموقع ويشتغل هو فهمتني ازاي؟

المذيعة : دي من ضمن المشاكل اللي حضرتك واجهت ايه؟

المهندس منسي : علجناها كلها وعملنا عملنا بلوك على كل البلاد ما عدا البلاد العربية الطيبة اللي الطيبين الحلوين دولهم يوم ما ييجوا يسرقوا بيخشوا صفحة صفحة ويسرقوها فعلبال ما يخش اتنين مليون صفحة يكون مات وكان عمره خلص

المذيعة : بشمهندس منسي كتير جدا من الشباب عاوز يوصل في سنة اللي هو انا بقيت بشمهندس فعاوزة أكون رئيس مجلس الادارة طب خدها واحدة واحدة والسلم واحدة واحدة نصيحتك لهم بتكون ايه؟

المهندس منسي :  لا هو هو مش نصيحتي لهم هو اكيد هيتعلم لوحده لا انا مريت بنفس المرحلة

المذيعة : لأ بيكونوا عاوزين يوصل بسرعة

المهندس منسي :   بصي انا هاقول لحضرتك على حاجة هم في الجامعة بيقول لك بصفتك مثلا مدير لمشروع بصفتك مش عارف ايه في الدراسة يعني ، انتي بتبقي طالعة من البكالوريوس لأ ده انا رئيس وزراء قليل علي

المذيعة :  ده فعلا

المهندس منسي : فهمتني ازاي؟ بتصدمي بالواقع مرة واتنين وتلاتة لغاية ما تبدأي الطموحات نفسها تبدأ تقل تقل تقل تقل لغاية ما تلاقي نفسك ما فيش حاجة تبدأي ايه؟ تبدأي تشتغلي على على ارض الواقع

المذيعة :  طبعا حضرتك شرفتنا ونورتنا حلقات كتير جدا

المهندس منسي : اكيد ده يشرفنا

المذيعة : تشرفنا بك يا بشمهندس الله يبارك فيك الله يبارك في. طبعا وبكده وصلنا لنهاية حلقتنا استنونا في حلقات تانية من برنامج اسرار الحياة.