أحسن طريقة لكتابة الرواية

ثم إنه يسأل البساطى ، فى مرة أخرى باعتباره ذو خبرة معلومة عن أحسن طريقة لكتابة الرواية وعندما بدا له كأن البساطى رجل لم يفهم ، قال : ” يعنى فى رأيك ، ماهى أفضل طريقة لكتابة الرواية ..؟ الكتابة باليد ؟ أم بالكومبيوتر ؟؟ أم عند الأستاذ البساطى اقتراح آخر ؟ ” البساطى قال بأريحية واضحة إنه شخصياً يكتب الرواية كلها بخط يده وبعد ذلك يكتبها على الكومبيوتر .. ” يعنى فى رأيك هذا أفضل شئ ؟ ” ” هو أفضل طبعاً ” وبهجورى يضع كراسة رسم على حجره ويوضح لنفسه : ” يعنى بعد ما أكتب بالقلم أكتب ع الكمبيوتر ” البساطى يعتبر هذا التوضيح للنفس تساؤلاً ويجيب : ” أفضل ” ” ياسلام ” ” طبعا ً ” وتمر فترة . بهجورى يحدث نفسه وهو غاية فى اليقين : ” فعلاً أنا عندى مشكلة كبيرة ” والبساطى يتدخل : ” ليه ؟ ” ” لأن انا معرفش أكتب ع الكومبيوتر ” ” ياسيدى مش انت اللى بتكتب .. فى ناس تديهم الكتاب وهما بيكتبوه ” “ياسلام ” ” طبعاً ” ” شئ عجيب ” ” ولا عجيب ولا حاجة ، كلنا بنعمل كده ” ” وينفع ؟؟ ” ” ينفع ونص ” ” والناس دى فين ؟ ” ” أى ناس ؟ ” ” اللى بيكتبوا ع الكومبيوتر ؟ ” ” فى كل مكان ـ شوارع القاهرة مليانة ” بهجورى يعدل طاقيته على شعره المدلى ، وبعد قليل يبحث فى جيوبه ويمد يده للبساطى : ” الكارت ده فيه كل تليفوناتى فى مصر وباريس ، لو سمحت يا أستاذ محمد أول ماتوصل تتصل بيا ، وتدينى عنوانهم ” ” عنوان مين ؟ ” ” الناس اللى بتكتب ع الكومبيوتر ” البساطى يأخذ الكارت ويتفرج على الكتابة ، ثم ينظر إلىّ . ويكون بهجورى عاكف على عمله كأى طفل وديع عنده لحية ، وقاعد يرسم على روحه .

إبراهيم أصلان