البذرة الأولى 1من  اصل5

بعد الانتهاء من وجبة الإفطار جلسا يتناولان الشاي وبدآ بالتحدث مع بعضهما. . بدأ «ميلانوفيا» بسؤال الجد:

– إلا قولي يا حاج بحُكم خبرتك كدة وتعاملك مع الناس، وكمان بحكم إنك عاصرت جيلين، الجيل اللي اتولدت فيه وجيل الأيام دي، فيه فرق في الأجيال؟ يعني الناس اتغيرت ولا هُمَّا كده من زمان؟

فكر الجد قليلا ثم قال:

– من أول لحظة شُفتك وشُفت أدّ إيه مستغرب. . ونظراتك علي البيت والحِيطان حسيت أدّ إيه إنت مفتقد لجو الأسرة، زي ما تكون غايب عن هنا من زمان أوي، مش مجرد كُنت مسافر بَرَّه البلد. . ده إنت زي ما تكون أول مرة تعيش علي أرض الكوكب

ارتبك «ميلانوفيا» بشدة ولكنه آثر الصمت حتي لا ينكشف أمام الجد وطلب منه أن يكمل كلامه. . فقال الجد مكملاً:

– طرق اندهاشك والحيرة اللي سيطرت علي ملامحك كانت بتوحي بكده. . بس سؤالك عجبني أوي يا صابر، ومش هنكر فعلاً كُنت محظوظ إني عِشت مع أفكار مُختلفة وفئات عُمرية بردو. . بس لو هتسألني عن الفترة المفضلة بالنسبة لي، واللي ارتحت فيها أكتر هقولك الفترة الأولى في عمري مع جيلي وأحداث جيلي. . طبعاً فيه فرق بين الأجيال كبير جدَّا. . مثلاً أنا فاكر زمان وأنا في الكلية كانت البنات بتلبس كل أنواع اللبس، كل واحدة حسب طبقتها الاجتماعية ومش هقولك كنا ملايكة. . لأ كنا بنبص عليهم مثلاً كأي شاب ينظر لبنت جميلة، حتي طرق المعاكسة علي الرغم من إن المبدأ خاطئ بس كانت غير دلوقتي خالص يعني الغزل بمجرد كلمة وانتهي الأمر، وفي وسط 50 شخص تلاقي شخص واحد بيعاكس، كان أغلب الولاد والبنات بيتكسفوا. . والفرق عن دلوقتي إن زمان كنت قبل ما تفكر تعمل اي شيء أو أي فعل لازم تفكر مليون مرة قبل ما تعمله. .