السرفيس

إنت عارف (السرفيس) ده إيه؟ ده أهم واحد في بلدك .. تعرف السبّاك؟ أهه (السرفيس) ده زي السبّاك بالظبط .. فِكرك حد يقدر يعيش من غيره ؟ أنا نفسي بحتاجله في شغلي .. لازم يبقى في وصلة مابين عالم فوق و عالم تحت .. حد يسلّك البلاعات اللي متقدرش تمد إيدك فيها .. يقفل الغطيان المفتوحة .. يشوف لك حاجة ضايعة .. يجيب لك صرصار مضايقك .. تستحمل ريحته و قرفه و شايه و سجايره و سرقته لصابون حمّامك طول ما إنت عايز مِنّه حاجة .. عارف العيب إمتى بقى ؟ لما تطلب من السبّاك ده إنه يعمل لك ديكور شقّتك .. تخيّل .. سبّاك و مُهندِس ديكور !! هنا الغلط إنّك تكلفه بحاجة هو مش قدّها .

أحمد مراد