طيور تانيين
بشوف الصقر فارد في الفضا باعه
وأتباعه
نشرهم ع الشجر ضاعوا
طيور تانيين
صغار مساكين
جواعى لكين
دوام صاحيين
ومش قادرين لأطماعه
عشان نابه ومخلابه
ومنقاره
باشوف الكل أحبابه
وسمّاره
ودنيا تخاف من القوة
وجوّ الدنيا مش هوَّ
واشوف بليل
غريب في الدوح!
بيرقص
رقصة المدبوح
بهفّة ريش
سقط عشه
حيشكي لمين
وفين حيروح
وادي له سنين
على دا الحال
يقاسي الحلو والبطال
يا صياد الطيور يا خال
يا صياد الطيور حافظ على الخرطوش
دا ميت عصفور كمان زيّي
ما يستاهلوش
هناك الصقر
لو تضرب على وكره
تلاقي اللحم متكوّم
ولا بياكلوش
يا صياد الطيور فكَّر
وشوف لك صيد
يكون أكبر.
أحمد فؤاد نجم
