أنا سُئلت هذا السؤال إنت ابن مين في مصر؟ لما روحت أشتغل استشاري في إحدى الجهات المهمة في البلد ففي الامتحان قالوا لي بابا ماسك فين؟ فقولتله: لا الحقيقة بابا ماسك نفسه.. فساعتها المسئول الكبير ده قالي يعني إيه؟ قولتله: يعني بابا راجل غلبان جدًا بس أنا راجل معايا اتنين ماجستير وتلات دبلومات ومعايا دكتوراه وبعمل التانية انفع ؟
المذيعة: يعني إيه بابا راجل غلبان جداً يعني انت كمان مارست نفس التصنيف..
الدكتور: لا بالعكس أنا هنا بعمل حاجة اسمها الإسقاط الايجابي اللي هو أنا بقوله أنا جايلك مش عشان أبويا أنا جايلك عشاني أنا فأرجوك خلي أبويا دا على جنب؛ لأن أبويا مش موضوع النقاش.
المذيعة: أصل أنا معترضة على هذه الكلمة كلمة إحنا غلابة دايماً أقول مفيش حاجة اسمها غلابة كلنا غلابة يعني طمعانين اللي معاه واللي معهوش طمعانين في رضا ربنا.
الدكتور: الفكرة يا فندم إن الكبير مش كبير علي غيره الصح إن الكبير يكون كبير بغيره وكبير لغيره، الكبير هو كبير في إنه يعرف إيه هى صفاته ويحسنها، الكبير في إنه يعرف إيه هى آهاته ويتغلب عليها، الكبير في إنه يعرف إيه هى قدراته وينميها، الكبير في إنه هو يعرف إيه هى المتاهات اللي هيقع فيها ويعديها، الكبير هو اللي هيقدر يحدد هو يقدر يفيد الناس بأيه، الكبير هو اللي يقدر يدي الناس، الكبير هو اللي يلم ويُعطي، الكبير هو اللي بيتعامل مع الناس باحترام وتقدير، الكبير هو اللي بيكبر الناس، الكبير هو اللي بيحتوي الناس، الكبير هو اللي بيفيد الناس، وخليني أقول لحضرتك إن مهما الفرد عاش في حياته لا يُحسب عمره إلا بما قدّم في حياته،
