محدش يتكلم ويقول تفاصيل مهمة ليها علاقة بفلوس او عناوين وهو راكب اوبر

محدش يتكلم ويقول تفاصيل مهمة ليها علاقة بفلوس او عناوين وهو راكب اوبر

اول امبارح الاربعاء ٨ فبراير ركبت مع سواق اوبر من الجامعة الامريكية التجمع الخامس لشارع المشير احمد اسماعيل شيراتون، وانا راكب جاتلي مكالمة من مطعم شركتي بتشتغل معاه بيقولي انا سايبلك ٦٠٠٠ جنية في فرع المطعم اللي ف مدينة نصر ابعت المحاسب ياخدهم. ملاني العنوان كتبته وكتبت هسأل على مين.

قفلت معاه كلمت محاسب الشركة وقولتله “روح مطعم كذا اللي في كذا كذا وادخل قولهم من طرف عمرو اشرف وهتاخد ٦٠٠٠ جنية وهتديهم وصل بالمبلغ”

طبعا انا مش مدي خوانة.. سواق اوبر سمع اللي انا قولته، وصلني المكان اللي كنت رايحه واتحرك على العنوان اللي مليته للمحاسب، خلال نص ساعة كان في المطعم قالهم انه من طرفي وقالهم دا لسه مكلمكم حالا واخد الفلوس وعدها كمان وقالهم انا هطلع اجيب الوصل من العربية وسرق الفلوس ومشي.

اللي اكدلي انه سواق اوبر هو اللي سرق الفلوس:

١- كاميرا مراقبة المطعم مصوراه وهو داخل وبياخد الفلوس وبيعدها لحد ما خرج.

٢- السواق وصلني لشارع المشير والرحلة انتهت الساعة ٢ الا عشرة، كاميرا المراقبة مطلعاه الساعة ٢ وتلت في المكان… مسافة السكة مضيعش وقت

٣- صورته اللي في ابليكاشن اوبر هي هي اللي في الفيديو

٤- محدش سمع المكالمة دي غيري انا وهو والمحاسب والمبلغ اتسرق في ظرف نص ساعة من المكالمة

٥- والتقيلة بقى: اوبر نفسهم عارفين انه هو اللي سرق الفلوس!!!!!!

اوبر عملوا ايه اما كلمتهم؟؟؟

بعد ما بعتلهم شكوى وبعتلهم الفيديو والصور قالولي احنا هنحاول نوصله ونتابع مع حضرتك وبس خلاص!!

طلبت منهم اسم السواق بالكامل ورقم بطاقته او اي بيانات من اللي عندهم تساعدني اني اعمل محضر قالولي احنا عندنا سياسة خصوصية لبيانات السواقين ومنقدرش نديك حاجة!!!!

الموضوع حصل امبارح ٨ فبراير ولغاية دلوقتي رد اوبر هو روح اعمل محضر! طب اعمل محضر ازاي من غير بيانات… وانا استفدت منكوا ايه كدا ودوركوا ايه انا لو راكب تاكسي برضو كنت هعمل محضر!!!!

انا اتسرقت واوبر شايفة ان “خصوصية” سواق حرامي اهم من سمعتها واهم من فلوس العميل

السواق اسمه محمد
العربية Renault Logan
رقمها: م ق ص257

#uber #uber_egypt #uberegypt

Experience
Amr Ashraf