أنت وعالمك الداخلي1من اصل2

كل واحد فينا عايش في عالمين متوازيين …. عالم خارجي وعالم داخلي ….

العالم الخارجي هو العالم اللي انت واعي بيه ….. بتشوف وبتسمع وبتحس … ناس واصوات واحداث واماكن وازمنة … العالم الداخلي بقي ده حكايته حكاية ……

تصور انك جواك نسخه من كل حد انت علي علاقة بيه في حياتك … نسخة حية ليها صوت وصوره … وبينك وبينها  مشاعر حب أو كره أو غضب أو امتنان أو الخ………. كل حد مهم بتقابله في مشوار عمرك بتخزن منه نسخه جواك ومعاها كل مشاعرك ناحيته..(وقت تخزين هذه النسخة) … يعني حضرتك جواك نسخة من والدك …نسخة حية رباعية وربما خماسية الأبعاد …بتتكلم معاها وترد عليك وتتخانق وتتصالح وتتفاعل  تفاعلات انسانية كاملة،سواء وعيك الظاهر (وانت واخد بالك يعني )أو في مستوي الوعي الباطن اللي انت مش حاسس بيه ولا تعرف عنه أي حاجة…أبسط صورة لهذه التفاعلات بتحصل لما والدك يغيب عنك ويوحشك … تيجي حضرتك وبكل بساطة تستدعي وتستحضر نسخته/صورته جواك علشان تفتكره وتتونس بيه وتدعيله…..أولما تعمل أي حاجة غلط تبص تلاقي حاجة كده طلعت من جواك تقولك (لآ) ده غلط أو ده عيب ا ده حرام …

جواك نسخة حية من والدتك .. متخزنة من أول ايام عمرك… ومعاها مشاعر الحب والرضا نتيجة حنانها واهتمامها بيك ، أو الكره والغضب نتيجة قسوتها أو أهمالها معاك…

جواك نسخ من اخواتك .. من اصحابك .. من مدرسيك في ابتدائي… من زمايلك أو أصدقائك ..من زوجتك وأولادك .. من جيرانك ..من كل حد انت علي علاقة بيه في حياتك ..جواك نسخ من الاماكن المهمة بالنسبة لك بكل تفاصيلها من جدران وأبواب وشبابيك ومقاعد وحتي رائحة الهواء فيها .. وكل نسخة مرتبطة معاها بمشاعر معينة تخص صاحب هذه النسخة وقت تكوينها وادخالها في عالمك الداخلي …