الخروج من كوكب الأرض2من اصل5

– تقصد «وطن» ابن «السيد»؟

– آه «وطن». . وطن الطفل اللي قلبه مكسور. . وطن اللي خلي دموعي تخوني. . وطن. .

– تعرف إنك طيب أوي يا «صابر» ومع إني ساعات بحسك متكير وكل همك الرقي والمظاهر، بس فيك حاجة غريبة. . بحس إنك مش مننا أصلاً بس متعاطف معانا.

– أنا مش مهووس بالرقي يا مريم، أنا بس بحب النظام، بحب كل حاجة تتعمل صح ومظبوط، كل واحد لازم يفكر إزاي يحسِّن أوضاعه، ويشوف كمان يقدر يساعد غيره بإيه عشان كلنا نرتقي.

– أنا أحياناً بحس إنك مش نازل مصر أجازة زي ما يتقول. . بحس إنك نازل تصلح حالنا أو تنقل لينا خبراتك اللي اكتسبتها من حياتك بَرَّه. . ودا شيء إيجابي إن كل واحد ارتقي بفكره وبأوضاعه ينصح غيره وينقلّهم أفكاره. . . لو كل واحد عمل زيك كده أكيد حالنا هيكون أحسن بكتير.

– أنا لما جيت هنا يا مريم كنت عارف إني هقابل صعوبات كتير، صعوبات في الكوادر، في الأفكار، في الإمكانيات، بس اتفاجئت إني بواجه صعوبات في الإنسانية والضمير. . عمري ما كنت أتصور إني أشوف طفل زي اللي شفته ده. . خلاني اترعبت من اللي وصلتوا له واللي لسه هتوصلوا له. .

– اللي لسة هنوصله! صيغة كلامك زي ما يكون إنك مش مننا أصلاً؟

– أكيد مش قصدي. . بس أنا في لحظة ممكن أسيب كل حاجة وأرجع مكان ما كنت عايش، بس انتوا هتفضلوا هنا وهتواجهوا الكوارث لوحدكم، أنا خايف عليكم فعلاً وكأن أنا اللي هواجه كل ده بنفسي.

– مش عايزة أصدمك بس مُضطرة إني أقولك شوية حاجات. . «وطن» اللي إنت شُفته فيه ناس كتير تتمني تبقي زيه، وهو حالياً أحسن من ألآف. . علي الأقل ليه بيت يروح له في آخر اليوم. . وعنده أُم يقدر يحط راسه علي كتفها لو ضاقت عليه الدنيا، وعنده شغل بيساعده هو وأسرته. .