قلعة حلب
![قلعة حلب](http://xn--mgbaaebccr4cxezfcdfg0g.com/wp-content/uploads/2018/12/0x68909C3A00817EF5873E45A38300EB17.jpg)
عنديْ وَرَا قلعةْ حلبْ
عينين أغلى من الدَهَبْ
عم يضحكو..
بيناتنا ليل وسَفَرْ
ودروب محَّاها المطرْ
لمّا بكو..
* * *
ماشي على دربِكْ
بصرخْ: أنا بحبِّكْ!
عم تيبس وْرَاق العمرْ
وتبرعم الكلْماتْ!
هالليل عمْ يسرُقْ من عيونِكْ جمرْ
ويرشرش النجْماتْ
عنديْ ورا قلعةْ حلبْ
صيفين من تين وعِنَبْ
لا تقطفي العنقودْ
بإيدين أصفى من القَدَحْ
خلّيهْ عَ غصون المسا موعودْ
عم ينزُف نبيد الفَرَحْ
بحكيلِكْ حكايةْ
وجهِكْ قمرْ
عتم السما مرايةْ
بيناتنا ليل وسفَرْ
وخيامْ منْ بدو وحَضَرْ
وبكل دربْ رايةْ
عندي ورا قلعةْ حلبْ
رموشِكْ أو سيوف العربْ؟
محنِيَّةْ أحلاميْ
عرَّشْ على كتافي التعَبْ
هدّلِّي أيّاميْ!
‘ شاعر سوري
![m2pack.biz](https://xn--mgbaaebccr4cxezfcdfg0g.com/wp-content/uploads/2023/10/m2pack.com_2.jpg)