أشعار عن الموت
جاني وانا في وسط ربعي وناسي جاني نشلني مثل ما ينشل الناس
مني نشل روح تشيل المآسي تشكي من ايام الشقى تشكي الياس
أثر الآلم في سكره الموت قاسي ماهالني مثله وانا إنسان حساس
جابوا كفن أبيض مقاسه مقاسي ولفوا به الجسم المحنط مع الراس
وشالوني اربع بالنعش ومتواسي عليه ومغطى على جسمي الباس
وصلوا علي وكلهم في مآسي ربعي ومعهم ناس من كل الأجناس
ياكيف سوا عقبنا تاج راسي وامي الحبيبه وش سوى بها الياس
أسمع صدى صوت يهز الرواسي قولولها لا تلطم الخد ياناس
قولولها حق وتجرعت كاسي لا تحترق كل يبي يجرع الكأس
أصبحت في قبري ولابه مواسي واسمع قريع نعولهم يوم تنداس
من يوم قفوا حل موثق لباسي وعلى رد الروح صوت بالاجراس
هيكل غريب وقال ليه الناسي صوته رهيب وخلفه اثنين حراس
وقف وقال إن كنت يانمر ناسي هاذي هي اعمالك تقدم بكراس
ومن هول ماشفته وقف شعر راسي وانهارت اعصابي ولا ارد الانفاس.
