أنا موجود اذن أنا أستحق …. 2من اصل3
ثانيا ..تصدق من جواك انك تستحق ..تستاهل ..يعني ..تستاهل تعيش …تستاهل تتحب..تستاهل تحترم..تستاهل يهتم بيك …تستاهل تتشاف ….تستاهل كل حاجة كويسة في الدنيا …ربنا ماخلقكش جزافا…ربنا خلقك وكرمك وحط في فطرتك وبرنامجك الالهي ملف اسمه “ولقد كرمنا بني آدم”
بني آدم يعني انت …
مطلوب انك تحس وتصدق وتعيش وتمارس انك “تستاهل” من اول ماتصحي الصبح لغاية ماتنام بالليل…
وخلي بالك ..أكبر غلطة ممكن تغلطها هي انك تربط انك “تستاهل ” بأي حاجة تانية عملتها أو قولتها…يعني تقول”انا استاهل اتحب لأني نجحت” أو “أستاهل أحترم لأني انجزت كذا” أو “أنا أستاهل أتشاف لأني حققت كذا” .لأ..لأاااااااا…انت تستاهل كل دول من غير ماتعمل أي حاجة ..تستاهل كل دول علشان انت موجود… علشان انت خلقة ربنا .
ارتباط انك تستاهل بتحقيق أو انجاز اي حاجة معناها انك بتحط لنفسك شروطفي حين ان ربنا لما كرمك محطش ليك أي شروط علي الاطلاق ..انت كريم ..انت مكرم…انت تستاهل ..مهما حصل ….
ثالثا تدي نفسك كل يوم فرصة جديدة، وأمل جديد …يعني ماتوقفش نفسك عند أي محطة فاتت في حياتك مهما كانت صعبة أو مؤلمة…ماتشوفش النهاردة بعيون امبارح …ولا بكرة بعيون النهاردة …اعتبر كل يوم حياة جديدة …واعتبر نفسك كل يوم في خلق جديد..وسيبك من الكلام التقليدي بتاع (خلي عندك أمل ) اسمها (طلع الأمل اللي جواك) ..لانه في الحقيقة الامل موجود جواك بالفعل ..بس محتاج منك تصدقه وتستخدمه…
رابعا .ودي أهم واحدة …كن نفسك ..ماتكونش زي ما أي حد عاوز..ماتسجنش نفسك في أراء الأخرين ..وماتفصلش نفسك علي مقاس أي حد، اللي عاوزك 37 واللي عاوزك39 واللي عاوزك42 …ماتسمحش لأي حد يشوف فيك نفسه….ويحاول يحقق من خلالك أحلامه الشخصيه ….ماتوافقش ان اي حد يشوفك امتداد ليه،او مشروعه الاستثماري الخاص ..ماتسمحش لأي حد يقبلك بشروط أو يحبك بشروط أو يحترمك بشروط …أنت نفسك ..نفسك وبس …انت في رحلة ….فيها صعود وهبوط…فيها حركة وفيها ثبات ..
