كلمه للمهندس محمد المهندس حول بعض مشاكل المصنعين بمصر مع العمالة

 كلمه للمهندس محمد المهندس حول بعض مشاكل المصنعين بمصر مع العمالة

 

بسم الله الرحمن الرحيم السادة الافاضل أعضاء الجروب المحترمين انا الحقيقة كنت قريت امبارح كده بالليل كده وانا قاعد شوية حاجات بوستات كانت نازلة على المجموعة بتاعتنا اه يعني لرجال الاعمال
والحقيقة يعني كانت فيها يعني شوية كده مع حبي وتقديري واحترامي للجميع نبرات يأس كده شوية يعني خلينا متفائلين باستمرار انا معكم ان في مشاكل انا معكم ان المشاكل تقيلة انا معكم ان الاحمال بقت تقيلة علينا قوي بس مش معنى كده ان احنا ينتابنا يعني نوع من انواع اليأس او الاحباط لا احنا نقاتل ونكافح وان شاء الله مجتهد نصيب
انا اقصد اقول لكم يعني كان مثلا على سبيل المثال موضوع النهاردة العمالة والمشاكل اللي موجودة في العمالة والفنيين النهاردة وعدم وجودهم وكل الصبية الصغيرة اللي راحت ركبت توكتوك للمكاسب السريعة والحرف النهاردة أصبح النهارده مش قادرين ميلاد حرفي جديد النهاردة بقت من أصعب المشاكل اللي بتواجهنا
ولكن أنا حابب إن أنا اقول على حاجة احنا بنحاول بقدر المستطاع كل اللي انتم جبتوا له مظبوط وكل اللي انتم بتقولوه واقع وما نقدرش ننكره لانه واقع زي ما بقول لحضراتكم الا ان ان احنا بنحاول دلوقتي بقدر المستطاع من خلال التعليم الفني ، أنا أعلم إن التعليم الفني كان بيطلع كوادر يعني مش هقول كوادر يعني لو قلت كوادر أبقى بضحك على نفسي نقول في السابق في السابق كان الى حد ما اللي بيخش التعليم الفني كان بيطلع إلى حد ما أفضل من حاليا
ولذلك حاليا احنا بدأنا كقطاع خاص تدخلنا مع وزارة التعليم الفني وقلنا لهم المادة العلمية من عندكم أنتم والمادة العلمية الكتاب يعني معنى المادة العلمية الكتاب القراءة والكتابة وكل حاجة تخص وزارة التربية والتعليم هي من عندكم ، اما الجانب اللي يخص الحرفي او الصناعي هيكون من عندنا ولذلك كان فيه كان لسه ماضي بروتوكول معه نائب وزير التعليم الفني محمد بيه مجاهد وان انا اتفقت معه في خمس مدارس للقطاع الخاص خاضهم يعني المصانع الكبيرة عندنا آخدتهم بافريا أخدت مصانع، رأفت الخناجري خد مصنع ، عمرو ابو فريخة خد مصنع فريخة في طنطا يعني هم موزعين الخمس مصانع دول والمصانع دي هي بتصرف النواحي الفنية والطلبة بيتدربوا عندهم بحيث ان لما يطلع الطالب ده مدرب جاهز وينزل سوق العمل سواء المصنع اللي هو صرف على الشركة اللي هي تبنت هذه المدرسة ، مدرسة نقول عندنا مدارس التميز يعني أطلق عليها كده مراكز التميز ، مركز التميز دي المظهر بتاعه في زين العابدين مدرسة في زين العابدين وبيتفرع منها عدة مدارس إحنا كان لنا النصيب كصناعات هندسية خدنا خمس مدارس شغالين فيهم دلوقتي لسه البروتوكول بتاعهم ممضي الاسبوع اللي فات
أنا بقصد من الحكاية اللي انا بحكيها السريعة مش عايز ادخلكم في وجع قلب وقلنا وقال ونحكي ونقول ده الا ان انا كل اللي انا عايز أوصله المعلومة اللي عايز أوصلها لكم ان احنا دخلنا المدارس ديت واحنا بناخد الطلبة بتوع المدارس بناخدهم ندربهم عندنا في مصانعنا.
انتم تعلمون جميعا اللي بيدرب دوت في اي شركة بيبوظ خامة بيبوظ ايا كان الا ان احنا يعني ارتضينا بهذا والمصاريف كلها علينا أحنا كمدارس يعني ، الهدف في النهاية خالص هو تخريج طالب فني يقدر النهاردة لو أتحط في أي مصنع أو إي شركة يكون عطاء وأعتقد إن ده هينفعنا في المرحلة الجاية نحاول سد بيها العجز الموجود بدل الولد اللي راح جاب التوك توك ، كان زمان الست تجيب الولد وتقول خد عمله و الولد يتعلم من الأسطه الكبير مكنش بيبخل عليه نعلم الولاد دي مهنة تنفعه فيما بعد دلوقت ده غير متاح
علينا أحنا نوجد البديل عشان نقدر نستمر و الغرض أن المواقف الكتير اللي بنتواجه المصنعين و أنا أعلم هذه المشاكل لان أنا منكم و أنتم مني ، بتجيلي مشاكل كتير أحلها وأديهم جرعة كبيرة من التفائل و الأمل و تقبل الوضع ونصمد هافضل أقول وأكررها دايما مش هايبني بلادنا غير ولادنا ربنا يبارك لنا فيهم ويعينا علي ما نحن فيه تحياتي ….

m2pack.biz