مكتب الناظر4من اصل5

– توقعي كده شُفت إيه لما جيت هنا؟

– بما إني قابلتك عند المدرسة فأكيد شُفت طلبة ومدرسين وعمال ومدير وفصول.

– هقولك شفت إيه، شفت طريق ما ينفعش الاطفال تمشي فيه. . شفت زبالة زبالة في كل خطوة بخطيها، شُفت مكان مليان تراب ومخلفات مصانع مكان زي البحيرة عرفت بعدين إن اسمه ترعة وعرفت إن كمان فيه أطفال بتنزل فيها. . شُفت أطفال يمكن ما عدوش العشر سنين بينطوا من علي سور المدرسة ويهربوا. . شفت بياعين جائلين بيبيعوا أكل ملوث قدام المدرسة. . شُفت فصول مليانة علي آخرها وإمكانيات تعليمية متدنية شُفت أوضاع لا ينفع تنشر علم لا يخرج منها عالمِ. . بس في وسط كل ده شفت حاجة تدعو للتفاؤل، لما قابلت مدير المدرسة واتكلمنا رحب بكلامي، ودي كانت حاجة نادرة إني ألاقي هنا حد يسمع لغيره، وشفت كمان مُدرِّسة بتسعي بكل جهدها عشان تعلِّم الأطفال وتساعدهم، ودي الحاجة الوحيدة اللي خلتني أتفائل شوية ويبقي عندي أمل إن ممكن حد ينقذ المراكب قبل الغرق. . كل ده في المرحلة الابتدائي بس، ممكن بقي تكلميني عن باقي المراحل. . قوليلي الوضع بكل صراحة ومن غير تزويق. . أنا عايز بس أعرف الحقيقة وأشوف جذور المشكلة. .

– بما إنك شوفت الوضع دا في المرحلة الايتدائية. . فمتهيألي مش هتتصدم من الكلام عن باقي المراحل.

– متوقع. . بس عايز أسمع منك برضو. .

– في الأول لازم تعرف إن أقرب مدرسة إعدادي من هنا بعيدة نص ساعة عن البيوت، وزي ما انت عارف إن هنا الإمكانيات قليلة والخدمات كمان. . أما بقي عن التعليم والفصول في الحقيقة الوضع ما بيختلفش كتير عن اللي شُفته في المدرسة الابتدائي. . الفصول مليانة علي آخرها والمدرس ما بيقدرش يسيطر علي الطلبة من كتر ما الفصل متكدس، ده علي ما يسيطر علي خمسين طالب ويسكت ده وده تكون الحصة خلصت. .